"الهرى" أسلوب حياة

  • "الهرى" أسلوب حياة
    دعاء فاروق

    اهرى يا مهرى وأنا على مهلى .. لسان حال أمثالى من هواة الفرجة اليومية على ناس هاريين نفسهم خناقات مع ناس تانيين هاريين الناس الأولانيين خناقات برضه !!... والهرى فى قاموس اللغة المعاصرة له أكثر من معنى على حسب الموقف ... فهناك الهرى الذى يصيب الزوجة الغيورة مع زوج " مقضٍيها " فلا تجد أمامها غير إنها تهرى وتنكت فى نفسها – قال يعنى إحنا عرفنا معنى تهرى لما هنعرف معنى تنكت – القصد يعنى إنها بتبقى لا على حامى ولا على بارد سيبوها باللى هى فيه ، قلبى عندها ، كفاية اللى هاريها تأليف وكذب وحاورينى يا كيكة ... ثم تجد أن الهرى يأتى بمعنى اللت والعجن ، أى نعم .. يهرى يعنى يرغى وياكل دماغك وودانك بكلام فاضى من برة وماليان أسافين وضرب تحت الحزام من جوة ، راجع برامج التلاتة فى واحد حيث المذيع هو الضيف هو المحلل الاستراتيجى هو ذات نفسه ناظر الزراعية أبو منشة وطربوش وقاعد ع القمة فارش فرشته ومش فاضى غير للسقطة واللقطة لفلان وعلان وهو برضه المخبر أبو جرنال مخروم وسوجارة سبارس وبالطو مقيح من كتر وقفته فى الشمس بيراقب الخلق .. وإختصارا لهذه الخلطة السرية ولاد الحلال أطلقوا عليه ( مذيع أمنجى ) .... ثم يأتى الهرى فى موقف آخر بمعنى آخر وهو تقضية وقت الفراغ فى التفاهة فيقعد يهرى فى أى كلام فارغ من برة ومن جوة ... راجع تعليقات الناس على فيديوهات اليوتيوب أغلبها شتائم بذيئة تدل على فراغ وحرمان عاطفى .. ما هو لو عنده ما يملأ هذا الفراغ ماكانش وصل بيه الحال إنه يقعد بالساعات يعلق على فيديوهات اتهرت مشاهدة من نوعية شاهد المذيع يخلع حذاءه فى وجه الضيف  ( اللى هيعلق تعليق بذىء هنا ربنا هيوديه النار ) وعشان تتأكدوا إن الهرى ده لغة العصر راجع كلامك منك ليها له وإنتوا بتتكلموا كلام من عينة ..  الواد ابنى ده لو شفته أنا ههريه ضرب ، البتش إعتتشدال صاحبتشى بنتشى الإيه وحشتنى قوى لو شفتها ههريها بوس ، حرام عليكى يا ماما إحنا اتهرينا كشرى غيًرى الصنف بقه... الناموس هرانى وأنا نايمة لازم أرش الأوضة بكرة .. المدرس هرانى أسئلة شفوى وماعرفتش أجاوب ...حيث إن الهرى أصبح أسلوب حياة ... إنما كله كوووم والهرى المتبادل بين فريقين يقفان على طرفى النقيض ده كوم تانى حيث يصل بهم الهرى المتبادل إلى درجات من الإستماتة فى دفاع كل منهم عن اللى يخصه وأحيانا يصل بهم إلى مراحل متقدمة من الجنان الرسمى فى تبرير أخطاء من يخصه .. جنان جنان !! كتاكيييت كتاكيييت !!... ده لو أمك مش هتبررلها كده يا أخى ما اللى يغلط قول غلط وخلاص ... إنت شفت يا عم ؟ لا ماشفتش بس هو كده ... إنت ياعم التانى ياللى بتهرى هناك انت ، شفت بعينك ولا سماعى برضه ؟؟ سماعى آآه... كله سماعى كده يعنى محدش عنده معلومة مؤكده أومال هاريين أبونا تبريرات وتحليلات وأبوك السقا مات ... بس هو العيب مش عليكو العيب على اللى بيسمع ويقرأ ويشاهد كوووول الهرى ده ومستسلم له.... بس أنا مش هستسلم ... أنا من موقعى هذا ومن واقع خبرتى فى سماع ومشاهدة وقراءة كم معتبر من الهرى السياسى قررت أن أشارك فى الحياة السياسية بحزب جديد سوف أطلق عليه حزب ( المهريين الأحرار ) والله الموفق والمستعان ...